പത്തനംതിട്ട ജില്ല
2025 ഡിസംബര്‍ 31 ന് മുന്‍പ് പെന്‍ഷന്‍ അനുവദിക്കപ്പെട്ട എല്ലാ സാമൂഹ്യസുരക്ഷാ -ക്ഷേമനിധി പെന്‍ഷന്‍ ഗുണഭോക്താക്കളും 2026 ഒക്ടോബര്‍ 31 ന് മുന്‍പായി അടുത്തുള്ള അക്ഷയകേന്ദ്രം വഴി മസ്റ്ററിംഗ് ചെയ്യേണ്ടതാണ്.
ഓമല്ലൂര്‍ വയല്‍വാണിഭം

ചരിത്രപ്രസിദ്ധമായ ഓമല്ലൂര്‍ വയല്‍വാണിഭം പഴയ തിരുവിതാംകൂര്‍ പ്രദേശത്തെ ഏറ്റവും വലിയ കാര്‍ഷിക-വ്യാപാരമേളയായിരുന്നു.നൂറ്റാണ്ടുകള്‍ക്കു മുമ്പ് തുടങ്ങിവച്ച ഈ മേളയെപ്പറ്റി പല ഐതിഹ്യങ്ങളും പ്രചാരത്തിലുണ്ട്. തെക്കന്‍ തിരുവിതാംകൂറിലെ വെളിനല്ലൂര്‍ വയല്‍വാണിഭസ്ഥലത്തു നിന്നും ഒരു കാളക്കൂറ്റന്‍ ഹാലിളകി വടക്കോട്ടോടി ഓമല്ലൂര്‍ വയലില്‍ എത്തിയെന്നും ഇവിടെയുള്ള ഒരു കര്‍ഷകകാരണവര്‍ ആ കാളക്കൂറ്റനെ വയലിന്‍റെ മധ്യത്തില്‍ ഒരു പാലക്കുറ്റിയില്‍ ബന്ധിച്ചെന്നുമാണ് കഥ. ഈ പാലക്കുറ്റി കിളിച്ചുവളര്‍ന്ന് ഒരു പാലമരമായി. വയല്‍വാണിഭത്തിന്‍റെ ഗതകാലസ്മരണകളുണര്‍ത്തിക്കൊണ്ട് ഒരു സ്മാരകമെന്നവണ്ണം ഓമല്ലൂര്‍ വയലില്‍ ഈ പാല ഇന്നും നിലനില്‍ക്കുന്നു. ഈ സംഭവത്തെ ആസ്പദമാക്കി എല്ലാവര്‍ഷവും മീനമാസം ഒന്നാം തീയതി മുതല്‍ വയല്‍വാണിഭം കൊണ്ടാടിവരുന്നു. ആദ്യകാലങ്ങളില്‍ ഒരാഴ്ചയിലധികം നീണ്ടുനിന്നിരുന്ന കാളവാണിഭവും ഒരു മാസക്കാലത്തെ മറ്റിനങ്ങളുടെ വ്യപാരമേളയും നടന്നുവന്നിരുന്നു. പത്തനംതിട്ട, കൊല്ലം, ആലപ്പുഴ, കോട്ടയം ജില്ലകളില്‍ ഉള്‍പ്പെടുന്ന പ്രദേശങ്ങളില്‍ നിന്നും കന്നുകാലികളുമായി കര്‍ഷകര്‍ വ്യാപാരത്തിന് എത്തിച്ചേര്‍ന്നിരുന്നു.

ഓമല്ലൂര്‍ വയല്‍വാണിഭം